Saforen poema bat

Safo

euskaratzailea:
Elena Garziarena

Jaungoikoen antzekoa dela

iruditzen zait niri

gizon hura,

zure aurrean eserita dagoena eta,

hurbildik,

zure ahots gozoa eta farre desiragarria

entzuten dituena.

Horrek, bularrean, bihotza asaldatu dit

zeren unetxo batez begiratzen zaitut

eta hitz bat ere ez dudala ahozkatuko

ematen du;

mihia trabatu egiten zait,

berehala su mehe bat

nire azalaren azpitik irristatzen da,

begiekin ez dut ezer ikusten,

belarriek burrunba egiten didate,

izerdia ixurtzen dut,

dardara batek harrapatzen nau osorik,

belarra baino berdeago nago

eta hilda egoteko gutxi falta zaidala iruditzen zait,

Baina denari aurre egin behar zaio, zeren...