Maiatz aldizkariaren lehen zenbakia 1982ko otsailaren 12an argitaratu zen Baionan. Etxegorri apaizak Angelun zuen multikopista edo estensil elektronikoz egin zituzten lehen zenbakiaren kopiak. 500 ale kaleratu zituzten, azalean idazle guztien lanak idatzita emanik, eta Baionako fakultatean egin zuten lehen aurkezpena, Euskal Ikasketen Institutua abian jarri berria zela baliaturik. Orotara 35 zenbaki plazaratu dira ordutik, 2001eko azaroan berriena. Maiatz aldizkariaren abiapuntua, hala ere, 1981eko maiatzaren 10arekin lotuta dator, egun horretan batu baitziren Itxaro Borda eta Luzien Etxezaharreta literatur aldizkari baten sortzeko ideiarekin, hain zuzen Mitterrand lehendakari bilakatu zen igandean.
        Ondoren deitu zituzten bilkuretara Iparraldeko orduko idazle gehienak: Casenave, Arkotxa, Xarriton, Erdozaintzi-Etxart, Lanatua, Tanburin, Zamora, Pelot... Gerora plazaratu diren idazle berriek ere izan dute tokirik agerkarian. Maiatz aldizkariaren lehen aleko aitzin solasak hauek izan ziren: "Aldizkari bat, gurea. Gauza batzu, denetarik, euskaraz, lantuak. Gure literatura. Literatura, zertarako? Gure sendimenduak ez diten bakarrik pasa bainan bizi ditzagun. Maitasuna, lana, tristezia eta mendiak, esperantza eta gau baten zoriona, euskaraz. Gureak euskaraz direlakoan. Literatura guretako. Ez gauza hil batzu, ikerketa hotzetarakoak eta errautsez bete erakustokietarakoak. Literatura bizirako". Maiatz aldizkariaren lehen zenbakiak Etienne Salaberrik 1968an idatzitako Nigar egiten dut zutaz poema dakar lehen testutzat, eta Itxaro Bordaren Zail dira usantzak poema bigarrena.
        Euskal egileez gain —nagusiki Ipar Euskal Herrikoak, baina baita Bidasoaz hegoaldekoak ere—, handia da Maiatz aldizkariak atzerriko egileei eskainitako arreta, idazle askoren lanak euskaratuz. Antzerkiak ere presentzia du aldizkarian, antzez-lan osoak eskaini izan baititu.
        Argitaletxe ere bilakatu zen Maiatz 1984tik aurrera, Itxaro Bordaren Bizitza nola badoan poema liburuarekin hasita.