Zure begiak

Jean-louis Davant

Maitearen begiak, ispillu biziak,

Nihaurenen dirdiran otoi ezti bitez,

Haien distiran egoñ ez nadien tente.

Emaztekien soa, gure kontzientzia.

Andrea maite duen gizonak

Maitea du ahalaz eztitzen

Batu nahi baititu bihotzak

Ere.

Emaztea, ihizgai duenak

Ilunpean hartzea bilatzen

Horri aski baitzaio gorputza

Bera.

Begien distira ez dezake

Jasan,

hartan

argi ta garbi ikus bailezake

bere aurpegia,

abere

baten

basa ihakina

erdi

gizaki

desegoki

eta gezurti

baten

itxura

itxusia.

Abereek inozenki

egiten duten hura

ez zitzaigu zilegi

erdizka, gezurrean,

baizik emaztearen

maitasun ederrean.

Bestela zergatikan

ilunbea ta lotsa?

Zergatik begiaren

ahalge ta beldurra ?

Arren,

arrak,

baldin emaztekia

maite badugu,

osoki eta egiaz

maita dezagun

begiz-begi,

argi garbiz.

Haren

begien

distiran

lirainik,

abere

larruaz

eta basaingeruaren

gezurraz .

biluz

gaitezen.

Maitearen begiak, ispillu biziak,

Nihaurenen distiran otoi ezti bitez,

Haien distiran egon ez nadien tente.

Zure maitasunean dut inozentzia.