L I T E R A T U R   A L D I Z K A R I E N
G O R D A I L U A

 

 
 

                   - Orrialde nagusira itzuli
                   - Maiatz aldizkaria
                   - Ale honen aurkibidea

                   - Ale honi buruzkoak (azalaren irudia eta fitxa)

Aurreko artikulua— Maiatz 6. Garazi (1984-apirila) —Hurrengo artikulua




 

 

Agur Garaziri

 

Dominique Ezponda

 

                  1

Sortzez Garaztarra naiz eta

Orai Lapurdin naiz bizi

Gogo bihotzak nahi ditut

Gaur hegaldatzerat utzi

Hastapeneko urte goxoak

Nik ez baititut ahantzi

Bertsu berri batzuen kantari

Heldu nitzaizu Garazi

 

                  2

Garaziko lurrean eginik

Lehenbiziko urratsak

Eta haur batek egin dezazken

Nigar irri-ta solasak

Bai eta ere gazte denboran

Egiten diren ametsak

Bizi batean nola ahantzi

Gazteko urte airosak

 

                  3

Garaziko hiri kapitala

Beti baita Donibane

Aldi bat baino gehiagotan

Izatuak gira hane

Izan merkatu edo feria

Denetan baigiden barne

Neure orduko lagunekilan

Hasi nintzan pertsutane

 

                  4

Goizetik arrats astelehenak

Merkatu egunak daude

Horarat ere juaiten ginden

Ardurenik buru alde

Egun hartan egin behar ziren

Lanak utzirik debalde

Hor ere pasatu izan dugu

Guk hameika arratsalde

 

                  5

Donibanen feria egiten

Dira lau aldiz urtian

Egun goxoak pasatzen dira

Neska mutillen artian

Karrikan kurri goiti beheiti

Dantzaldia trinketian

Gu goizik etortzen ginden eta

Etxeratzen berantian

 

                  6

Donibane dena komertsa da

Baditu aunitz ostatu

Baginakien nun jan ziteken

Eta nun zaiken jostatu

Gure artean bazagon pertsu

Ixtorio eta kantu

Garaztarren airostasuna

Behine ez da faltatu

 

                  7

Biramunean ere oraino

Kantu musika gogoan

Bertze feria noiz izanen den

Oroitzen gira orduan

Lagun guziek partitu aitzin

Hitz emena baiginduan

Berritz ere bertze horen bertze

Egitea urrenguan

 

                  8

Lur maite hortan sortu nintzen ta

Hor berean naiz hazia

Jainko onari eskertzen diot

Egin zidatan grazia

Hobekiago iragaiten da

Ontsa hasten den bizia

Nik ere Garaziri zor diot

Neure izaite guzia

 



Literatur Aldizkarien Gordailua Susa argitaletxearen egitasmoa da.