Luma airosen markak

Gaitzaren Gaitz

Menturaz, errezagoa da sexu orotarik garbiki baztertzea, norbere emaztearen lagungoan behar den hein osoz irautea baino.

Montaigne
(Entseiuak)

Ordaina

Filoxonek bere kantuak arras gaizki kantatzen zituzten teila egile zenbaiti teilak hausten zizkiela: «Zuek nere eginak masakratzen dituzuen ber, nik zuenak.»

Diogenes Laertzio
(Artzesilaoren bizia)

Gakoa

Bere gustuak onesten ustetsiko zaituenak esku zartaka goretsiko ditu zureak.

Horazio
(Ad Scaevam)

Ahalkekorra

Ez dakit hiltzen begiratzen bazait...

Molière
(Le Dépit Amoureux)

Kritika eredu bat

Dionisiok, Joko Olympikoen aroaz, bertze guziak handitasunez gainditzen zituzten orgetan, poetak eta soinulariak bidali zituen bere poemen ozentzeko, erregeki oihaleztatu eta urreztatu denda eta gelekin. Ahoskeraren faboreak eta soinuaren bikaintasunak erakarri zuen hasieran jendearen entzumena; baina, eginaren eskasia pisatu zuelarik, lehenik gutiesteari lotu, eta, bere ustea gero eta ozpinago bilakatuz, berehala kolerari, eta errabiaz lasterka joan ziren haren muntaketa aberatsaren desegitera eta urratzera. Eta gero, nola haren orgek galdu baitzuten lasterraldian, eta haren ontzia galernak zehakatu baitzuen, denek egiatzat zeukaten Jainkoen kolera zela, publikoa bezala, poema txar haien kontra suminduak baitziren. Hondamenetik itzuri marinelak ere jendearekin ados ziren.

Diodoro Siziliakoa
(Oroigarriak)