Bake osorik ez

Enbeita'tar Balendin

Gauza andia da gizonarentzat

bakian bizi izatia,

andiagoa bakia zer dan

bear dan lez jakitia.

Ez da dirua, ez osasuna,

ez aukeran bizitia

goi maitasuna, barruko poza,

or dau egizko bakia.

Itxas ontzia baketsu, arro

doia itxaso barian,

uste izanik bakez, zoruntsu

dala uraren gaiñian.

Bakeak iges egiten dautso

ura astintzen danian,

gora ta bera balantzan dabil

gaxoa galdu gordian.

Lorak usaintsu, txoriak kantuz

udabarrien ederra:

aize biguna, eguzki gozo

bakearen antz-ikurra.

Loren poz eusle, aize bigurri,

txoriak negu gogorra.

Bake osoen amesa, baiña,

ez da bake iraunkorra.

Gizona doia mendian gora

bakea lortu gurarik

giro ederra, bakartadia,

dana dau ixil ixillik.

Baiña gauaren itzalen bildur

biotzak ez dau bakerik

gura dau, baiña ezin dau lortu

egizko bake osorik.

Bake osoen aunditasunak

guztiok gaituz poztuko,

sendo ta zintzo jokatu daigun

bake au irabazteko.

Bake osoan jaube emoille

Aita Goikoa dalako,

zeru goietan izan ezian

beian ez dogu lortuko.