Loreak eta zimaurra

Bordari

Loretxo-bi, ari ziran

Landa-hegi-egalean

Berriketan.

—Aizan, bai gerala eder

Usai ta yantziz. Aberats

Koloretan.

Gu gaitun, gu, apaiñenak;

Sotil eta maitienak

Mundu ontan.

Nortzu izakitan gu lako?

Naizen klabeliñak, ez diñ

Parerikan!

Ez al den, larros laguna

Egia, nik ben-benetan

Diñotana?

Bitarte, bai a la fede!,

Zeok, gu'tik... zimaurrera.

Alajaña.

—Arrazoi dun, klabeliñ polit;

Gure soinekoak ez diñ

Berdiñikan.

Ezta Salomon berare

Gu lez yantzi. Ezin ere,

Iñundikan!

          * * *

—Zaudete ixillik, arroputz

Alenak, dio basterretik

Zimaur onak.

Eder; ederrak zerate.

Polit; txoil-politak, noski;

Zorionak!

Baña, zeñeri eskerrak

Zerate, eder eta polit?

Esan, esan!

Zer ziñateke, orain, gaur,

Zimaurrik ez pazenute

Arteka, yan?

           * * *

Menpekoak ez direla

Ezetsi bear, diñosku

Alegiak.

Ta arrokeria itsusia

Dala: orai eta beti

Ikasgaiak.