Barne-oiuak

Joxe Azurmendi

1) Biar

Eta urak, ur berdeak itxasoa bezala,

eta urak, ur aundiak itxasoa bezala,

urak itxasoa bezala

bete-beteko du askatasunak oparo

euskal lurraldea.

2) Esaidazute

Zer den galdetzen dut lana,

zer den justizia, esperantza,

maitasuna. Zer diren gizonak.

Zer den aide argia, zer den

ogia, lur landu biguna,

aurren eriotza, esaidazute zer diren.

Galdetzen dizuet guztioi

zer den pobreen kulpa

iñoiz iñork barkatu nai ez duena.

Belaunbikaturik

dizuet galdetzen guztioi,

arren, esan zaidazutela noiz

argituko duen egun berriaren goiza.

Esaidazutela zer den zerbait,

zer den edozer gauza, esaidazutela.

Gezurrak ta diruak

kutsatu gabeko zerbait zet den.

3) Gabez

Nekatuta nago!

Nekaturik irixten naiz beti gabaren atera

ta zin egiten dut ez sekula geiago

afan alferretan lerregiteko.

Ta goizero argiarekin asten naiz atzera,

berriz billa ta billa, esperantza zoro batez.

Zeiñek aterako lidakean biotzetik

maitasunaren sustrai orpoa!

Zeiñek emango lidakean

presondegi urte batzuen atsedena!

Edo eriotza.

4) Eskuak

Argia debekatu zaigu.

Poza, itxaropena

ta argia debekatu.

Pobreak gera-ta...

Arratsaldeak euri egiten du

euskal mendi saietsetan.

Pobreak gera-ta

ez dago aterperik guretzat,

debekatu zaigu.

Askatasuna debekatu zaigu

kostako aize leunak

alamerako neskatxen illea,

ikurrin moduan,

askatzen duelarik.

Amar dirade mandamentuak

ta amaika bai

pobrearen naigabeak.

Debekatu zaigu

gizon izatea.

5) Kate

Kate onek lotzen nau,

kate onek nau iltzen,

kate onen gogorrak

nau ederragotzen.

Kate onen erpetan

bizitza bizitzen,

deabruzko fede au

luzaro sofritzen.

Eztarrian kantua

kate zakar onek

dit gabez itotzen.

Katean loturik

bizitzaren gabean

urruntzen joan ala

Rembrandt-en illun-argiz

pintatzen zaidala

nire zortearen

imajina zitala

itxaso barearen ertzetan.

Kate mingarri onek

nau ederragotzen.

Nau gizon biurtzen.

6) Desterrua bide

Nire ariman desterrura

begi apalez nentorren.

Betidaniko bidea

luzea da,

luzea, bai, eta aldatza

eriotzeraiño.

Itxaso, ibar eta mendi,

naiz gau ilun naiz eguzki,

kalbario gora

nintzaden ibili.

7) Zu baiño ederrago?

Zu baiño ederrago?

Aingeru bat.

Aingeru bat?

Zu baiño ederrago

zeu bakarrik,

triste ta

begira begira,

amodio eske.

8) Langilleak

Au diagu

pobrearen jakitea:

lanegin, lanegin,

lanegin ta iltzea.