Nora

J. Azurmendi

Zer egingo zuen orain

txalopatxoak

itsasoa ustu da-ta?

txalopa txalopatxoak.

Sikatu zaio saetsetako

dirdai lizuna.

Aspaldion egon zan txalopatxoa

beti egon, plaian erorita.

Txori zuriak

pasatzen ziranean

zerua kurbatu gabe

aidean.

Mendi gainetan

gelditu da eguna.

Ibarretan gelditu da

eguna, gizarte au, ibaiak,

bideak. Nora ote doan

eguna. Egun triste bat,

egun denak bezala,

edo neska itsu bat bezala

triste, egun argiz bete

oso tristea plaian erorita

eguzkitan sikatzen.

Plaian erori zan eguna,

gizarte au, neska itsu bat,

maitasuna, geroa,

eta nire zerua.

Itsaso dena sikatu zan

eta nik ez dakit,

txori zuriak

argia kurbatu gabe

doazenean,

zein esperantza daukan

oraindik gure txalopatxoak,

egunak, ibarrak

zure ta nire zeruan.