Iru torreak

B. Gandiaga

Iru torreak, luze ta garbi,

arkaitzen urdin ganean

zuri ta zinbel ta izarrei buruz,

illargitako aidean.

        T'ez dakit zertaz mintzatuz

        t'ez dakit zer gogoratuz,

        luze ta garbi, ari diran ain

        oparo gaua zoratuz.

Ta arkaitz urdiñen ganean,

iru torreak, zuri ta zinbel,

illargitako aidean.

        Ta illargitako aidean,

        gauari jaulkiz ederra,

        pianu baten lore aratzak

        ta uraren otsa eta, noizik bein,

        txitxarren kantu leberra.

T'ez dakit zertaz mintzatuz

t'ez dakit zer gogoratuz,

leber eta aratz, ari diran ain

oparo gaua zoratuz.

        Ta arkaitzen urdin ganean,

        argi ta eder, pianu baten

        lore aratzak aidean.

Ta aidean eta abarrean,

t'ezin igarri batean,

oroi liraken argidurazko

ta aratzdurazko nastean,

susmo ta amesen alako zeren

argidurazko ta aratzdurazko

alako zerak, denean.

        T'ez dakit zertaz mintzatuz

        t'ez dakit zer gogoratuz

        susmo ta amesak ari diran ain

        oparo gaua zoratuz.

Ai, zer gogoak!

................................

        Arkaitzen urdin ganean,

        oroi ta amesen alako zerak

        illargitako aidean.