Bizi gorapen

Muniategi'tar Sabin

Gora, aupa bizitzaren emaitasuna!

bai lur,

bai itxasoz

eta, bideetako goiz-arrats ibilgarriz,

bizitza dan guztia

norbereka,

atz-begietan

betikoz,

egamin;

bakoitza bere izakera

adur,

bere eresiz;

bakoitzaren biotz-muin,

goi berezia,

amets-ikutuka,

gogora ekarriz.

Betor bai gora-miñez, irauntza pozgarriz

bere oinbide,

bere zoriz;

betor eguzki epel

eta, beroz;

Illargi bete

eta, lañoz;

Iaungoikozko iturrietan aozpetua,

betikotasun, gose,

eskugarriz.

Betor bideari bere goia emanaz

bere, arantza,

bere lorez;

betor bai,

gizontasunezko egintzaz,

bata-bestezko bideratze,

ta, oinkadarik bulartsuenaz.

Betor,

Udaberri eskeinkor, arnas berritu,

Udaberri gaindu, eder bat bezela,

txintadarik baikorrenaz;

betor, argia goituz

maite-irrintzika,

bere bizi-nai,

bere zorion-egarriz;

betor, bai, gogoz,

Izadiaren berezko bultzada

biztuerarik argienaz.

Betor bai,

liparrez, egunka...

bakoitzaren sen, gogo, asmoz...

bakoitzaren kezka, arduraz,

bakoitzari

berea emanaz.

Betor bai, onez,

bakoitza bere ele,

mintzaira sakonez;

bakoitza bere goi,

bere lurrera;

betor,

bakoitza bere amesgai,

bere akats-utsune,

gau-egun eder guztien loreiltasun,

ikara biozkorrez;

betor noranai,

goiz-gora,

arratsez...

begiak eletuz,

biotzik zabalenez;

eta eder-arteko eskeintza,

emaitzarik bizienez.

Baño, batez ere,

betor,

izar,

lore,

odeibide txuri-oztiñez

edo, oinpeko arri-kaxkar,

arri ibiltari ta, aitzburu agetu

tinkoenaren egokitasunez;

betor alai,

zugazpe,

ibai

eta, zelai-artez...

bakoitza bere biotz on,

bere gogo mardul,

iriñik onenez...

biziari darion izanbide,

emaitzarik ederrenez.

O!, Izadi!

O!, Bizi!

O!, Etorri!

Atozte bai

ale zindo,

atoz zu,

zu, ene Gizon!

Begi argi,

esku garbiz

biurrikeririk gabe...

atoz zu,

zu batez ere!

Oñots bakoitzaren bizi-bildura,

gogai, izakitasunez;

bakoitza bere ibilbide

ta, ioan-etorri,

sakon-azalez...

Betor,

eguna bizi

eta irabaziz,

lenaren gogo, txustar-berritze,

aurrerapenik bultzakorrenez;

betor,

zar-berriz,

bere etorbide

arnas betikorrez,

gizatasuna darioten ongarri,

bere muin-barrutiko bizigai,

iturri gardenez.

O, bai,

atozte onez,

elkar-girozko eguntasun,

irrintzi goitarrez;

iriñik onenaz landuriko

maite-munkada bizitsu,

orerik garbienez!