Kemena

Muniategi'tar Sabin

Eguneroko biziratze ta eriotasunetan,

itxasoaren ioaldi, eraso ta, ekaitzaldietan...

gizona,

ain uts ta billuts,

ain makal ta arroputz

ain argal,

ain ezerrez...

bideko amets ta lillurakizunez

lokatz-zingirazko oñaze ta negar-illunbetan,

itxasoaren gorabera, uin iaso ta nastuetan,

urduritasun kezkatsu, biotz-barrupe mingarriz

egalik-egal,

bidebera, argi billa ari dan

gizon itun,

gizon makal orrek...

O, bai zerbait bear du bai, zerbait,

zerbait munduan bizi al izateko;

zerbait bultzakor,

itxaropenkor;

zerbait bai, buru tente, buru zut,

zerbait bai, zerbait, zuzen ta artez,

bidean, gogo sendoz ekin

ta, iarraitzeko

ogia eztan ogi, ardoa eztan ardo bat,

gogoaren iaki ta ianaritzat;

zerbait bai eskutsu ta goralkor;

zerbait gogo betegarri,

zerbait bai, zerbait,

bizialdi urduri,

bizialdi geraka onen sendagai ta burupeko;

zerbait bidegarri, zerbait bultzakor,

eraginkor...

o, zerbait bear du bai, zerbait, zerbait...

gizonak gizon izateko:

arnasondo bulartsu ta oialki beregorri bat,

ta itxaropenezko argitada, amets-bultzada

ta, eragin iorankor

gogo, aundi-aundi bat,

bide nekegarri, bide aztun onen aurrelari

ta, izartzat...

kemena bear du gizonak, kemena,

kemen susperkor,

kemen eusgarri, kemen bizigarri bat;

ta, itxaropena ta itxaropena:

itxaropen ongarri, itxaropen bizi, aundi bat,

bein ta berriz gure arraunai aspergabe eragin

ta, argi iturrietara begiak apalki iasoaz,

bidean aurrera iarraitzeko;

kemena bear du bai, kemena,

kemena munduan munduko

munduan bizi al izateko!