Ni naizen ontzi beartsu oni...

Muniategi'tar Sabin

Ni naizen ontzi beartsu oni,

itxasoan

zutik,

zuzen,

artez,

gogoz ibil-arazteko,

itxasoan

kemenez,

sendo,

bidez-bide,

gogoz aurrera iarraitzeko

ta, ekaitzaldi,

uin-arteko

ur-eraso,

bultzada itsu, gogorrari,

biotzez,

kemenez,

gure bizi-lema maiteari

tinko,

irmo,

gure biziari zuzen eusteko...

o, bai, ortarako

zaintzen,

garbitzen,

txukuntzen,

ortarako berritzen det bai,

ortarako ene ontzi txiki,

ene intxaur-oskol kaskar au;

ortarako loi

ta, zikin artean,

kaskopean itsatsirik,

iosiak ditun

belarki,

lapa

ta,

muskulluak kendurik;

ortarako bai, ortarako,

garbitzen,

berritzen,

ortarako berritzen ditut bai,

bere abe ustel,

ta, ol zarrak

aldaturik;

ortarako naiz

arduratzen,

kezkatzen,

ortarako saiatzen naiz bai,

bere saiets ezurrak,

bere goi ta azpiak

breatu

ta, margotzen...

gero, itxasoak zear,

nire biziko ontzi onek,

alik zindoen, alik tinkoen,

txukun ta sendo

azkeneraño iraun dedin!