Zer artu zuen gudariaren emazteak?

Bertold Brecht

euskaratzailea: Igotz

Zer artu zuen gudariaren emazteak

Praga-tik, uriburu zaarretik?

Zapata pare artu zuen Praga-tik,

agur bat eta takoizko zapatak.

        Orixe artu zuen Praga'tik.

Zer artu zuen gudariaren emazteak

Varsovia-tik, Vistulak zearkatuatik?

Varsovia-tik atorra bat artu zuen

liñuzkoa, margo eder-ederrezkoa.

        Orixe artu zuen Varsovia-tik.

Zer artu zuen gudariaren emazteak

Oslo-tik, Sund-ek ureztatutik?

Oslo-tik larruzko iduna artu zuen,

bezuza eder bat artu zuen Oslo-tik.

        Orixe artu zuen Oslo-tik.

Zer artu zuen gudariaren emazteak

Bruselas-tik, uri eder apaiñetik?

Bruselas-tik, egal-eio dotoreak,

emakume batek beti amestuak.

        Orixe artu zuen Bruselas-tik.

Zer artu zuen gudariaren emazteak

Paris-tik, argiaren uritik?

Sedazko jantzi bat artu zuen

—aren lagunen erre-miña—, Paris-tik.

        Orixe artu zuen Paris-tik.

Zer artu zuen gudariaren emazteak

Tripoli-tik, Libi urrunetik?

Libi-tik, katei bat eta kutunak

tupikizko kateia artu zuen.

        Orixe artu zuen Libi-tik.

Zer artu zuen gudariaren emazteak

Errusia-tik, eskualde amaigetik?

Alargunaren buru-zapia artu zuen

Errusia-tik, illetetara joan zedin.

        Orixe artu zuen Errusia-tik.