Etxean daukadan xaguari bertsoak

Jose Antonio Gesalaga «Zaldubi»

Xaguaz behar dut hasi

bere kontuk kontarazi

etxean sartu ta egin zaigu

etxeko nagusi,

gauez asko amorrazi

bere soinu eta guzi,

zenbat gauetan horrek dit neri

loa galerazi!

Negua hemen igaro

ta horrek jan du oparo,

denetik nahiko daukan lekuan

bizi nahi luzaro,

katurik ez du itxaro

ta nagusitu zeharo,

etxe honetan xaguarentzat

beti da uztaro.

Nauka amorruz beterik,

ez dut pentsatzen besterik:

ez dudala nahi gehiago hemen

hori egoterik,

ezin asetu goserik,

ez dago aberasterik,

tranpa guztiei ihes eginik

hor dabil librerik.

Zuloak nahi ditut itxi,

bainan ezin dut iritsi,

itxi orduko beste aldetik

xaguak dit hautsi,

ezin daiteke sinetsi

beregan hainbat zientzi,

etxea neure izanagatik

ezin diot eutsi.

Ekarriko dut katua

xagu madarikatua!

inork ez dakin egun txarrean

nere etxera sartua

eta hontaz gustatua

nahiz ni egon naskatua,

gaurtik aurrera bila ezazu

beste ostatua!

Agur eta hurren arte

joan zaite txit aparte,

pakea eman ezazu behintzat

ikusi bitarte,

txarrak dira zenbait urte

janari gutti dakarte,

munduan zehar izan ezazu

hemen haina zorte!