Gabonak (1985)

Luis Baraiazarra

Kalez-kale zorion

emanez elkarri; (bis)

kanta-algaraz

nahi dugu, beraz,

Gabon iragarri. (bis)

Beti bezala apain

alaituz begia,

aurtengo Gabon festak

hemen daude ia.

Denok pozez jartzea

da umeon lehia,

etxetara zabaldu

Eguberri deia. (bis)

Jaiotzak betetzen du

egun hau urtero,

erregaluz beterik

dator Olentzero;

Gabon ta Urteberri,

Erregenak gero...

jo dezagun pozarren

soinu ta pandero! (bis)

Belengo Umetxoa

da gure altxorra

zeruak eman digun

maitasun sarkorra;

entzuten ari gara

musika jatorra:

Aingeruen txirula,

artzainen danborra. (bis)

Umore freskoz dator

haize hozkirria,

ea loratzen zaigun

ahoan irria;

jolasti-aurpegiaz

hor Eguberria,

ariman egin digu

pozezko zirria. (bis)

Laster garai hobeak

badatoz, agian

Gabonek piztu duten

zorion argian,

herrientzat bakea

batasun harian,

hori nahi genuke

guk jaion atarian. (bis)