30 aldizkari argitaratu zituen Susak 1980tik 1994ra, 33 zenbaki (horietatik hiru bikoitzak izaki). Lehen aleak EUTG ikastetxea du helbide, bigarrenak Donostiako Herrera auzunea 1980ko apirilean (azalean Rafa Serrasek egindako logotipo betirakoa), eta laugarrenetik hamaikagarrenera Donostiako Alde Zaharra 1983ko martxoa bitartean. "Ttonto-ttonttuan iritsi gara eta atzeko atetik sartu; eta gainera ia ezer ikusi gabe irabazi! Gero eta indartsuagoak gara, gero eta trebeagoak... Laster nobelak idazteko gai izango gara". Estreinako bost urteetan Mikel Antza, Mikel Hernandez Abaitua, Josu Landa, Xabier Montoia, Eneko Olasagasti, Pablo Sastre eta Iñaki Uria dira eragile nagusiak (portadista: Julio Pardo); hala eta guztiz, sorkuntza literarioak hartzen duenez toki zabalena, asko dira Susan plazaratzen diren idazle izenak, Euskal Herri osokoak. 1983an bilakatu zen argitaletxe, Xabier Montoiaren "Anfetamiña" poema liburuarekin abiaturik (indar handiz aurreneko lau urteetan: 34 liburu); eta horrekin batera Argia astekariaren helbide bera zekarren, Donostiako Egian aurrena, Lasarte-Orian 1990ko abendutik 1994ko abendura. Gorka Arresek eta Iñigo Aranbarrik gidatu zuten azken zazpi urteetan. Susaren 31, 32 eta 33 zenbakiak Lubaki Bandak burutu zituen (Asier Serrano, Xabier Aldai, Harkaitz Cano, Gari Berasaluze...). Ale monografiko eta gehigarri berezi franko kaleratu zituen Susak, noiz edo noiz errezitalen bidez aurkeztuak.