Mugaz bestaldeko auzoan

Gerardo Markuleta

Bizi izan naizen hiri guzietan

bazen beti gizon bat leihoan biluzik;

         adarbakar urdinen bat, bidea galdurik;

         hamasei urteko neskatxak,

                                 neba-maitasun eske;

eta orduen gurpila berba-makilez trabatzen zuenik,

bai eta bide ertzeko aldaretxoetan

                                    larrosa bat eskeintzen zuenik ere.

Maite izan ditudan hiri guzietan

bazen axolik gabeko gauzekin arretaz arduratzen zenik,

eta ordurako ez gazte, ez garbi, ez abertzale ez zenik;

         hiztegiak, salmoak eta kalenderak maite zituenik,

bai eta Lisboako mapa-saltzaile zaharrekin

                                    hitzaspertuak egiten zituenik ere.

Bizi izan naizen hiri guzietan

bazen eginbeharraren iheslaririk,

eta ipuin eske zebilen ezpain umelik;

bazen neska biluzirik pasiloan barrena;

         ekaitz gauetan hustutako oheak zenbatzen zituenik;

         ibaien ezpondak biltzen saiatzen zenik;

         txakur deslaiak ferekatzen zituenik;

bai eta komuna publikoetan pornografia irakurtzen zuenik ere.

Maite ditudan hirietan

badira banatu arren bizialargundu ez direnak,

eta atsotitz, errefrau, zuhurtitz eta kanta zaharrak biltzen dituenik,

bada marrazkiak burmuinaren alde izkutuaz egiten dituenik;

         poema anhidridotan barrena labain egiten duenik;

         umeari gauero ipuin zahar bat kontatzen dionik;

         hegoari txoraize edo andraize esaten dionik;

         eleekin biderketa eta mugekin kenketa egiten duenik;

bada hontza iruditxoak biltzen dituenik,

                               eta txantxikuak, eta marraskiloak, eta trikuak; bada kronopioa etxean —eta batzutan ohean— onartzen duenik,

bai eta dordokei azal lehorrean elai bana marrazten dienik ere.

         Bizi naizen hirian

bada oroimenaren laberintoan haria galdu ez duenik,

bada sofa-oheak maite dituenik,

eta mimosaren eztandak liluratzen duenik;

         zinismoaren maldetan etzan ez denik;

         erret-bide bazterreko aulkiei ezetz esaten dienik,

bai eta bere harria murrailetik kendu eta zubian ezarri duenik ere.

Bada beltxuririk, bada agoterik, bada ijitorik,

bada azken maitasun istorioa beti bukatu berria duenik,

bada ahazturaren pardela

                           desegin eta berregin etengabe dabilenik.

         Bizi izan naizen hiri guzietan

bazen mugaz bestaldeko auzorik.

         Maite ditudan hiri guztietan bada

mugaz bestaldeko auzorik.