Tttu-ttuá-ren izpirituak kezka handia du, betidanik, kulturaren adierazpen guztiekiko. Jakina da, noski, euskal idazle berriei ematen dizkiegun aholkuak, bati baino gehiagori oso baliagarriak izan zaizkiola: "Hobe duk euskaltegi batean eskolak eman, motel" eta antzekoak. Orain, eta artearen mugak zeruarenak bezain zabalak direnez, ez dugu nahi izan geure arloa literaturari mugatu, eta margolaritzan egiten ari diren ahalegin aurrerakoiren bati, Mateo M. Mantillarenari alegia, omenaldi txiki hau eskaintzen diogu. Era berean, ale honekin eta aparteko prospektoan beraren erakustaldiaren berri ematen dizuegu.