L I T E R A T U R   A L D I Z K A R I E N
G O R D A I L U A

 

 
 

                   - Orrialde nagusira itzuli
                   - Xaguxarra aldizkaria
                   - Ale honen aurkibidea

                   - Ale honi buruzkoak (azalaren irudia eta fitxa)

Aurreko artikulua— Xaguxarra-2 (1981) —Hurrengo artikulua




 

 

 

 

Oharra: Bi poemaok Vicent Torrent valenciar poetarenak dira, eta Al Tall abeslari taldeak abesten ditu "Quand el mal ve d'Almansa" diskan.

 

Gaitza Almansatik datorrenean...

 

Vicent Torrent

 

euskaratzailea:
Mikel Alvarez

 

Historia igaro da ja,

hauts eta lurrek estalia,

baina bertatiko gaitzak,

Almansako gaitzak,

oraino erretzen

herri guztia.

 

Betoz alkimistak,

sorgin eta ezkutariak,

ilunbea garbi dezaten,

dena ezkutatzen duen

denbora konjura dezaten.

 

Almansan lur jo aurretik

bizitutako jendia

lehen tribunan

etor bedi argira;

jar bitez berdinkiro

Jaume Lehena eta Ausias March

ermandate eta ofizioekin,

itsasjende eta laborariekin.

 

Lilura gartsuago egin

zuon indar guztiekin

eta etor bitez bestara,

hirugarren tribunan,

jaiotzeko direnak,

jende argi eta subirano,

beren buruen jabe;

eta jar berdinkiro ere.

 

Musika eta erromantzeak

entzuten dituzuenak

zabal begiak eta ikus

zuon tribunetatik

jendearen artean

zabaltzen den bidea.

 

Prozesioa hasiz doa,

luze, triste, desolatua,

buruan doa bourbondar erregea,

Felipe bosta, prakanasaia,

atzetik hamazazpi ehunetan zazpia

eta Era Berriko dekretua;

Cabanilles organista

tokata bat haizatzen;

Maulet asko morrala bizkarrean

etxea non jasoko bilatzen;

hariaren ehuleek

felpa eta tapizak daramatzate;

han doaz zerri eta botiflerak,

botifler eta sugandilak,

ernegari eta salatariak,

andre-gizon "sokarratak",

lapur, apezpiku eta markesak,

senyera urraturiko untziak,

Karlos Austriako, atzera egiten;

biperrauts, kalami eta arrantza,

D'Asfeld, lumadun demonioa,

suemaile sumindua,

gerlari katalan eta ingelesak,

Portugal eta Holandakoak,

gazidurak eta prostitutak,

almendrak, arroza eta patxak,

frantsesak eta gaztelauak,

"saragüells"-ak, Almansako gaitza;

Maulet gehiago doaz,

Botiflerik apenas,

Berwic eta Blanquer doaz

eta Frantziako Luis hamalaugarrena,

liberak, diruak, "divuites"-ak,

abertzaletasun berria doa

gaztelazale eta iruzurkiro,

jantziberri doa Estatu modernoa

eta jaunttoak bazkaritara,

Penjadet eta Basset,

Quart de Poblet sutan doa,

Katibako errautsak aidean

eta hauts hodei handia

argi artean zabala da,

eguzkia segizioan doala,

erotsak daramala;

konjurua ez da betiko

eta historia igaro da ja,

baina bertatiko gaitzak,

Almansako gaitzak,

oraino erretzen

herri guztia.

 



Literatur Aldizkarien Gordailua Susa argitaletxearen egitasmoa da.