L I T E R A T U R   A L D I Z K A R I E N
G O R D A I L U A

 

 
 

                   - Orrialde nagusira itzuli
                   - Zantzoa aldizkaria
                   - Ale honen aurkibidea

                   - Ale honi buruzkoak (azalaren irudia eta fitxa)

Aurreko artikulua— Zantzoa-4 (1997-negua) —Hurrengo artikulua




 

 

Maitasunezko axiomak

 

Stanley

 

Hemen bazina

AEK-ko irakasleak nola maitemintzen

eta desmaitemintzen diren ikusiko genuke.

Ez al litzateke zoragarria izango

gure abizenak jartzea belauntzi bati?

Bankuetan dirua azukre bihurtzen da

gogoratzen zaitudan bakoitzean.

Garai hartan guztiak errimatzen zuen

zure begien kolorearekin

norbaitek argia asasinatu balu bezala

zugandik kanpo

norbaitek erlojuak egin nahi balitu bezala

gure aurka.

Azken musua automatikoki bihurtzen zen lehena

eta ibai baten izena ahaztu zitzaion

geografiako maisuari.

Hemen bazina

arkatzak landatuko genituzke eta estutxeak bildu.

Distantziak ez lirateke gure arazoa izango,

txoriena baizik.

Bazirudien itsasoa, historia, soziologoak eta ONG guztiak

gure maitasunaren alde zeudela.

Negua izugarri atzeratu zen urte hartan

zentimetro, dezimetro eta metrotan neurtzen nuen

zure edertasun luzea.

Eta hala ere ez zaude hemen.

Jakin nahi nuke

bai, jakin nahi nuke

nire ametsetako zein koordenadatan

galdu zaren...

 



Literatur Aldizkarien Gordailua Susa argitaletxearen egitasmoa da.