Zure zain

X. Azkue

                                Doinua: lurraren pean.

             1

Amalilea bihotzekoa

nola pasa den denbora!

Zenbat gau ilun igaro diren

ezin dezaket gogora.

Barne-barneko sentimenduak

nola nezazke kanpora

mila zatitan hautsiko bait zait

maitasunezko anfora

berehala ez baldin bazatoz

eztiki nere ondora.

             2

Zuk badakizu nola dagoen

Gasteiz aldez gartzela,

susmoa daukat giltzapeturik

Langraitz bertan nagoela.

Bonbila batek lotsagabeki

argitzean "egongela"

erretzen doa zure argia

gordetzen duen kandela

argizaria bihurtaraziz

nere maitasun epela.

             3

Prado parkean footing egiten

nenbilen izerditan blai

zuhaitz artetik azaldu zinen

irrifartsu eta alai.

Begi urdinen argitara ni

ezin nintzen egon lasai,

erdi itsutu ninduzun eta

zorabiatu ere bai.,

nere bihotzak zu maitatzea

beste ezer ez zuen nahi.

             4

Behin eta berriz somatu nuen

Amaleteo izena,

Salonikako olerkaria

aspaldian omen zena.

Nere barnean sentitu nuen

haren beraragipena;

olerki, bertso, irudi garbiz

aseaz irudimena,

begi aurrean nuen, ordea,

inspirazio onena.

             5

Zure ederra ikuskatzean

Amaleteoren poza!

Nola ahaztu Amalilea

Maitasunaren Jainkosa,

orbain gabeko liraintasuna

zure irudi panpoxa!

Pradoko lurrak zirudienez

Atenaseko harlosa

zure ondoan baino gehiago

inon ezin nuen goza.

             6

Armentiako bide luzea

bihurtu zenez Grezia

zure ondoan pasiatzea

hura plazer berezia,

jainkotasunik ez izatea

horra nere ahulezia!

Esan zenidan nola gainditu

hilezkortasun hesia

mugagabeko maitasun hori

nuelako merezia.

             7

Basilikara iritsi ginen

begiratuaz elkarri

pago arteko zelai berdean

lasai zintudan ezarri,

irrifarre bat oparituaz

ahoaren estalgarri

maitasunaren errekastoa

muxu guztien egarri

emeki, goxo, ezpain gainean

nereak nizkizun jarri.

             8

Bete-betean jarraitu nuen

zuk lehenago esana

zure larrua muxukatuaz

berotu nintzen, laztana,

berrogei aldiz sartu-atera

ondo egin nuen lana

bihotz barneko erraietatik

atera nizun labana

odoletan blai gogor eutsiaz

ezker eskuan neukana.

             9

Iturri gorriz bete zitzaizun

zure bularraren gaina

magikotasun hutsez zerion

edari mardul bikaina

miazkatuaz aritu nintzen

barneratuaz mingaina

modu horretan lortu nahiean

Jainko handien tamaina

mugarik gabe zu maitatzeko

Zeusek Mnemosine aina.

             10

Bi gizon arrotz etorri ziren

orduan geunden tokira

atzekaldetik lau beso sendok

bortizki ninduten tira

jainkotasuna lortuko nuen

inguratu ez balira

gogoratzen dut zure itxura

izar hezeen dizdira

izare gorri baten gainean

infinitora begira.

             11

Neri laguntzen zerbait gehiago

saiatu izan bazina

ez nuke nere baitan izango

itotzen nauen samina

handitzen doa eguneroko

monotonia zikina

pentsamenduan birak emanaz

beti ideia berdina

beldurrik gabe nere buruaz

beste egiteko grina.

             12

Nere barnean Ameleteo

zure zain dago isila

Amalilea eskatzen dizut

etortzeko haren bila

guztiz ireki diezaiozun

zeruaren maratila

baina ahalik eta azkarren

mesedez izan dadila

iristen zaren une horretan

aurki ez nazazun hila.