|
Zenbait poema
Unai Elorriaga
Littera (96 -6 - 23)
Mila bederatzirehun eta
hirurogei eta hirugarren urtean
latineko hiztegi bat egiten ari zen
gizon betaurrekodunak
lan serio-inportante bat egiten zebilela
uste zuen
geroko kulturarentzako iker-bide-helmugatzat
zeukan.
Millabederatzireundairurogeitazazpian
euskarazko hiztegi bat egiten ari zen
gizon bizardunak
lan ilusorio-fribolo bat egiten zebilela
pentsatu zuen
lau katu hezitzeko metodo ez-deustzat
zeukan.
(96-6-22)
Nik
behar zaitut
nire etorkizunak
behar zaituelako
Nire etxe berria berotzeko
derrigorrezkoa zaitut
zuk
geroaren giltza bait daukazu
Gure proiektuetan
ezinbestekoa zara
zu gabe
biharko egunik letorke?
Beraz
nik
behar zaitut
bankuko zuzendari jauna
interes bajuko prestamoa egidazu.
(96-6-24)
Ez dabilen
kuku-erloju bat
daukat etxean
kukuak biziorik gabeko bizia du
kukua bizi bait da;
minbiziz kasi hil direnak
orratzak dira.
kukua kateatuta egon daiteke
erloju barnean
edo kukua Tahitiko taxi estatiko baten
orratzik ez dagoen hondartzara doake.
kukuak turistei ordua galdetzen die
ez ordua interesatzen zaiolako
denborari adarra jo nahi diolako baizik
lehen berak jotzen bait zizkion orduak.
kukuak
gutun bat idatzi dit Tahiti-tik
oihuka ari zaizkit bere le-trak
galdera sorta da: zerga-tik?
zeintzuk diren nire me-tak.
zergatik erosi dudan
funtzionatzen duen
erloju berria.
(96 - 6 - 25)
Ihintza laboratorioetan
sortu nahi zuten
lore-landareetatik
desagertua zegoelako
kasu, apenas egiten zitzaiolako
zientifikorik ospetsuena
deitu egin zuten
enseiu-probeteetatik
atera zezan
gizarteak berriro arnas dezan
ikerlariak azterketa
sakona egin zuen
Bilintxen bertsoetatik
erantzuna lortu nahian
zientzia-sentimenduen ezbaian
gau batez
mendian galdutako ume
batek
gauzarik berriena bezala
ihintz tanta bat oparitu zion amari,
goizean, poxpolo kaxa batean
ordurik hona
ume itxurakoentzat
bakarrik ote dira
magiazko malkook?
Enpresarioa (96 - 6 - 23)
Hots!
Hots!
Telefono hotsa
saltzaileen ahotsa
numero hotza
ez, ez naiz lotsa
Bihotz!
Bihotz!
Negozio mingotsa
lagun arrotza
diru morrontza
stres zorrotza
bai, erosi sugearen hortza
Bai!
Bai!
Pesetatan blai
hiltzen denean, ai!
Eizue lo lasai
Ofizio ofiziala (96 - 6 - 23)
"Nik herria zuzentzen dut"
esan zuen politikoak
"nik kanpaiei eragin"
erantzun kanpan-zaleak
"nik estatua aurrera ateratzeko
egiten dut lan"
"nik soka honetatik tiratu"
"ni jendearen etorkizuna lantzen
ari naiz, nobletasun osoz gainera"
"kanpaiak pertsona alaitu ohi du"
"etsaiak urrunzen ditugu, dirua hurbildu,
entrepresak sortu, geroa eraiki,
hiriak edertu, baserria gurtu..."
"hileta elizkizunak alai jotzen ditut"
Orduan politikoak diru sorta
eskaini zion; ez bait zuen jendea
alaitzerik nahi... oposizioan zegoen eta.
| 
