—Olerti / Euzkel Pizkundiaren Olerkirik Onenak—

Jantzi daigun euzkerea

Enbeita'tar Kepa

Odeyak illun itzalak dabiz,

Ekatxa dator errira,

Ama zar batek tamalez diño

Jarririk oni begira

        «¡Ene galduba, semiok nigaz

Gomutetan ezpa-dira!»

Oñazez bere begi apalak

Iturri bigurtzen dira.

        Lo txarra kendu eta itxarturik

Ikusi daigun bakotxak

Ortzia baltzik, mendijak zuri,

Lurra gogortuta ixotzak.

        Euzkera zarra erdi billoxik

Dardagan darabil otzak.

Au ikusirik, ez laguntzeko

¿Nun dira euzko-bijotzak?

        ¿Zer balijo dau zuri, baltz, gorri

Edo nabar ixatiak,

Baldin ezpa-dau zer ikusirik

Orraz Euzkera maitiak?

        Aldi batera itxirik, bada,

Politikeri-nastiak,

Euzkereari danok zabaldu

Biar dautsaguz atiak.

        Erdi-billoxik ba-dago bere,

Jantzi biogu Euzkera,

Erabilteko txukun-txukunik

Alde batetik bestera.

        Jauna'k guretzat emon euskun-ta

Euzkeldun onak ba-gara,

Guazen jantzi ta indartuteko

Biar daunaz laguntzera.

        Negu baltzian il zadizantzat

Nai-zabez billoxik itxi;

Alperrik, baña... iñoiz be ori

Ezingo dabe jadetsi.

        Seme zintzuak egingo zabez

Orraztu ta «sedaz» jantzi;

Zure gurenda baita edonun

Urrezko izkiz idatzi.