—Olerti / Maite kantak—

Izarrak kiñuka

Etxaniz'tar Nemesi

Izarrak kiñuka ditugu goietan,

maiteak biñaka dirala bidetan,

maiteak biñaka dirala bidetan,

izarrak kiñuka zeletan.

        —1—

Eiztariak bidean

zu jetxi zai daude,

zure ego txuriak

zulatzeko, maite.

Nere usategian

sar zaitzadan arte,

nere uso kutuna,

goitik ibil zaite.

        —2—

Azala txuri dezu

elurraren pare,

begi-ondoak berriz

itxas urdin bare.

Zure biotza artzeko

bota nai det sare:

aspaldi jaso nizun

nerean aldare.

        —3—

Laztan eskea dezu

matrail-txuloetan,

laztana lertzen dago

nere ezpañetan.

Etsaiak gal ez gaitzan

bere tentaketan,

zurekin bearko det

laster eztaietan.

        —4—

Zure ezpain-loretan

erle izan nai nuke,

duten ezti guzia

jasotzeko, maite:

zure gogoz betetzen

pozik niñuzuke:

beti zure morroe,

dezun ezti-truke.

        —5—

Zure beso-kakoak

estutu nazate,

oiek bitez neretzat

zoratzeko kate:

kartzela ortan itxi

neri leio ta ate,

zure besotan preso

nazazun il arte.

          MAITE GALDUARI

Burua zuritu zait

zure biotz-eske,

ala ere errukirik

ez didazu, maite.

Zeruetan biontzat

lekurik ba-daite,

maite bearko nazu

Yainkoa dan arte.