—Itz-Neurtuz—

Larraun'go aurrak «Orixe»ri

Etxaniz'tar N.

Euskal-baratze izkutu ontan,

gu gaituzu txikienak;

Larraun-ballerak sorturikako

landare gazte ta aienak;

gorputzez txiki izanagatik,

biotzez aundi ta aurrenak;

argatikan gaur zuretzat dira

gure eskerrik onenak.

Liburu on ta ederrik asko

eman diguzu euskeraz;

gure amaren izkuntza xarra

apaindurik zure lumaz;

argatik zure gaztetako lur

ontan guziok batuaz,

gure Euskal-Maixu aitor zaitugu

zure lanen gorapenaz.

NINIKO, leoikume xaloa,

atera zan kaiolatik;

gure izkuntza, zuri eskerrak,

jaiki zaigu seaskatik;

Uitzi ta Leitza, napar-erriak,

ezaunak dira zugatik;

euskal-arnasa jaso baitzendun

Larraun'go mendietatik.

Baña ba-dugu, zure lanetan,

denen gain zor dizuguna

URTEKO MEZA-BEZPERAK

dugu aren izen ezaguna;

liburu orrek Jainko-eskolan

ezi digu euskalduna;

argatik euskal-aurrok txaloka

jaso dugu zure eguna.