Arrantzaleak

Basarri

               1

Arrantzaleak, gaur kanturako

bidea jartzen didate.

Ez nago lasai beren izena

goi mallan ezarri arte.

Beren ogia irabazteko

¡zer buruzpide daukate!

Zuentzat beti gerrate...

Sarri gertatzen ezpada ere

maitatzekoak zerate.

               2

Itxasoaren aserraldiak,

¡bai aserraldi sakonak!

Ongi daki au urte askoan

an ibilita dagonak.

Burruka ortan beti galera

aterako du gzonak.

Asko mindutzen bagaitu ere

orain auzoaren onak.

Ondo kostata irabaziak

oi dira zuen txanponak.

               3

Kantauri zarra jartzen danean

kopet astun da aserrez

Kristauak aixa iraultzen ditu

bere olatu zakarrez.

Gero, sutondo jator askotan

arantza latzak indarrez,

Galdu zaioten aita maitea

burura ekarri bearrez.

Zenbat famili ikusten diran

beltzez jantzita negarrez!

               4

Maindire zuri biguñak utzi

eta goizean txit goizik,

Otar bana ta parolarekin

ontzira doiaz ankutsik.

Ezta sufritzen ez duten euri,

aize bolara ta otzik,

Ainbat nekeren ondorenean

sarritan etxera utsik...

Arrantzalea maite ez duenak

ez du izango biotzik.

               5

Boga, boga, bai, mariñel onak,

boga, itxas bazterrean,

Aurrerantz ere jarrai zazute

lengo era jatorrean.

Amabirjiña bitartekotzat

zuen oitura zarrean.

Arrai prexkoen itxaropenez

zai gaudenak legorrean,

Txapela erantzi bear genduke

arrantzalien aurrean.

Zarautz. 1949