1984 abendua

Perseides Uriz

Ez naiz sekula

Knosos-en laberintoan galdu

ez bait naiz sekula

nire laberintotik

atera joana.

Metil isozianatoak

ez du akautu Bhopalerria

ezta laguntza-taloietan

izena jarri duten Manhattango

gorbatadun zorrotzek ere.

Reagan eta Wojtila anaiek

ez diete Etiopiako marxistei

nekerik bat ere leporatu;

gosez hiltzen direnei

zer ote bota gehiago?

Ez dakigu segurantza haundiz

Kristo bazen ala ez.

Zalantza horren kariaz sorturikoa:

                       —izugarria, txo!—

Vicente Aleixandreren gorpua

oraindik bero zelarik:

             "Kongreso honetara

                  ez gara etorri

                 poesia egitera"

—zioen Rodríguez de la Borbollak—

Horretarako OTAN-en lehiaketara

joan beharra dago beharbada?

Orwel-en urtea?!...

Ez da horrenbeste izana!

Euskalerrirako berririk

par-negargarriena ezin zuelako

funtsean barrundatu:

Jelkide Abertzaleen Kraskadura!!!

Ondorengo urtearen lehen berrearen zain nago.

Horren ardura burura datorkit

ez naizela sekula

Knosos-en laberintoan galdu

ez bait naiz sekula

nire laberintotik

atera joana.