Neska-mutil garbi-zaliak

Enbeita'tar Balendin

                Mutillak

Illun-abarren gerizpe baltzak

Ixiltzen ditu basoak;

Mendi-zelaiak ixillik dagoz,

Murmurka errekatxuak...

Une onetan gogoratzen daust

Neure maitasunan suak

Etxe inguruan dirala oingo

Neure maitian pausuak.

                Neskeak

Gaurko eguna igande da-ta,

Goizetik nintzan mezatan;

Arratsaldian, iolas garbian,

Gure erriko zelaian;

Illuntzerako etxera nator

Garbi-zalien antzian,

Askoz obeto nagualako

Gautu ezkero etxian.

                Mutillak

Maite ba'zaitut, maitatzen zaitut

Nik beti maitasun garbiz,

Sekulan bere ni ez naz bizi

Loikerirako egarriz;

Lagunduteko gertu naukazu

Bardin nai gabaz nai argiz;

Etzara txarto bizi izango,

Nirekin beti ba'zabiz.

                Neskeak

Neure bizitzan garbitasuna

Nainun izan dot gogoko,

Jaunari indarra eskatzen dautsat

Lora eder au zaintzeko.

Maite ba'zaitut, maitatzen zaitut

Garbi-zale zaralako,

Eta biotzez esaten dautzut

Etzaitudala itxiko.

                Biak batera

Abestu daigun biok batera,

Alkarturikan biotzak;

Bata bestian maitasunean

Jarraitu daigun bakoitzak.

Loraz jantziak izango dira

Guretzat mundu-arantzak

Zorioneko benetan dira

Garbitzalien ezkontzak.