|
Udaberria kantagai
Satarka
I
Euzki beroak berpiztu ditu
Zelai, mendi ta baserri.
Lore politak jaio dira-ta,
Bazter danak usaingarri.
Urretxindorra gauaz, egunez,
Poz-pozik dabil kantari.
Erleak arin lore ederretan
Gogo onez biltzen janari.
Bizi berria dator guretzat...
Eskar anitz, Udaberri!
II
Lore politez jantzi dira gaur
Belardi eta zugatzak.
Lurrin gozoaz uri, baserri,
Arkitzen dira aberatsak.
Argitu dira baso, mendiak,
Aldendu dira ekaitzak.
Txoriak ezin egon ixillik,
Alai dituzte biotzak.
Orra Udaberrik, maitez, guretzat,
Zoragarrizko emaitzak!
III
Mendi-mendian goizalde arin,
Odei beltzik gabe argi.
Lilluragarri zuaitz ta landak,
Lore berritan txit zuri
Zoragarrizko lurrin gozoak
Usaintzen uri, baserri.
Edertasun au ikusirikan
Txoriak pozez kantari.
Gure biotzak alaitu dira...
Aintza, zuri, Udaberri!
IV
Ortzea garbi arkitzen dana,
Ez da odeirik ageri.
Baratz, zelaiak, liliz beteak,
Bazter guziak apainki.
Baserrietan enara beltxak
Kantatzen dute alaiki.
Ardi politak belardietan
Belarra janaz gozoki.
Udaberria degun bitarte
Gu zorionez, ederki!
V
Piztu da gartsu, argi berria...
Arindu dira mendiak.
Baratz, landa ta sagardietan
Jaio dira gaur liliak.
Zoragarrizko lurrin gozoak
Usaintzen baxter guziak.
Agertu dira urretxindorrak,
Txori kantari zoliak.
Gure biotzak alaitzen ditu
Urtero Udaberriak!
VI
Euzki ederrak bidali du urrun
Zoritxarreko Negua.
Loreak jaio dira-ta... non-nai
Unkitzen da usai gozua.
Pozez kantari urretxindorra,
Kukua eta xoxua.
Enarak egin du baserrian,
Umientzat kabitxua...
Udaberriak gure barruan
Piztu du maitasun-sua!!
VII
Arindu eta sendotu gaitu
Egunsentiko argiak.
Loreak jaio ta usai gozoaz
Uri, zelai ta mendiak.
Pinpilinpauxak leunki aidean,
Gogoz zurgatzen liliak...
Gu ere alai kanta-kantari,
Biurtu gera txoriak.
Udaberriak gaur piztu ditu
Gure biotz ta begiak!
VIII
Goizean txit goiz agurtzen gaitu
Eguzki berogarriak.
Elurra bezin zuri, loretan,
Apain daude sagardiak.
Usai gozoaz lilluragarri,
Baso, mendi, baserriak.
Kanta-kantari ez dira aspertzen
Txoriño maitagarriak.
Udaberriak orra guretzat
Egun atsegingarriak!
| 
