Bideratu nadin

Muniategi'tar Sabin

Bideratu nadin egun-egunera,

onezko, ederrezko, maitezko egun,

alegin biziminduzko bidegintza,

itxaropena darion goiz argira.

Atera nadin gogoz, zintzotasunez,

azkatasunaren bide nekegarriz...

gizarte, aberri, zuzentasun alde,

iñoizko bidegiterik alkartuenez.

Argi ta garbi, maitezko izkilluakin

io ta ke, bideratu nadin bai, pozez;

bideratu nadin gogoz, gau ta egun,

ele bizi baten langallu sendoakin.

Ta, ots ene oñok, ots! Zuzentza bidez

illuna ezetsi, sasiak sutaratuz...

Ots, eskuak alkartu, besoak zabalduz,

bide berritzezko ekite ederrez!

Ots ene oñok, ots! Kementsu ta sendo ots!

Izan miñezko alkargintza maitez...

Giza alde, Aberri alde... iñoizko

bidegite, ereintzarik bioztuenez!