—Bertso paperak—

Nafarroa, andere zahar lizuna

Patxi Perurena

        Bertso berriyak paratzeko eskatu didate Bidasua alde orretatik. Nola ba, bertso berriyak!! geure burubari tentuban eusteko ere gauza ez gera eta iya.

        Zortzi kopla zaar aurkitu ditut, azken aldera (6garren bertsuan) Bidasua ere aaztutzeko ez daukatenak, eta oyetxek bialdutzia eman dit goguak. Ez nizuke esango seguru, ez bainazu musiku jantzi oyetakua, baiña, M. Laboa-k Berreterretxen Kanthoria jarri zuan doñuban (eta bestian ere) nik uste dotore kantauko ituzula, patxara earrian! Amaitutzeko, ona zer diyoen egilliak sarreran:

        Behiala, zera batzu zeratu zirela medio, honako kopla lizunok sortu ziren mundura. Eta, orain ez dute jada baste itzulbiderik, beren buruari gogor egitea baizik. Nafarroa, lurralde abandonatu gisara ageri da hemen; gizonak halako batez berarekin topo egin, basatiki ernaldu, eta bere ume ahula sabelean duela arrastaka doan andere itsuaren antzera. Edo, beste zernahi gisatara ere eman daiteke hemen Nafarroa. Ausaz, irakurle bakoitzak berera.

             1

Nafarroan da Bardena

lurralde zelai zekena.

Zezenak behia bezala haunat

estaliko gaur matena.

             2

Saraitzuko mazeletan

masustak gorri laharretan.

Oi! mosu gozoz jan ahal banitza

hire ezpainak odoletan.

             3

Ultzamaldeko ibarra

arre orotan belarra.

Larru gorritan zuri zuriak

eztia ditun bularrak.

             4

Baztango soen ederra

gari artean eperra.

Amodiotan murgildu nahiz

ikara ditun izterrak.

             5

Larraunen goiti Aralar

alor haunditan garagar.

Iturri gorri lur hezean

haragi suzko mila adar.

             6

Bidasoa harana beheiti

urak baretuz doazi,

goi menditatik jeitsi ondoren

elkar laztanduz emeki.

             7

Kantauriak hazi zuriz

izorra hindunan guziz.

Lurralde antzuok ernaltzerat

etorriko al dun berriz!

             8

Udazken haize gerizan

etzanen gaitun garitzan,

artean, gaua so egin ezan

eta niketz ontsa izan.