Lizardi, Rimbaud etorri duk hitaz galdezka

eta gu ere hire zain geundela

       esan zioagu

ez hintzela aspaldi azaldu

       etxetik;

       eta belatzean etzan gaituk denok

       erlojuak janez

eta mezularia bidali diagu Alosko dorrera

       eskailera luzetan

       beleak uxatzen

       ote hintzen ikus zezan...

gero kanpaiak erortzen ikusi ditiagu

       elizetatik, ihesari eman ziotek

       zakurrek...

orduan sortu haiz bidetik, balantzaka

eta hirekin aurrez aurre jarri garenean

       zerraldo

       erori haiz gure oinetara

eta gorpu hintzen

       deskansatzearren udazkenean

       eseri haugunean...

edurra hasi duk segituan

       eta begiak hertsi ditiagu

       eta goizaldean, muxika hezur batetan

sartu eta gero

       pirotekniarik gabe lurperatu haugu

       baratzan