|
Black music made in Euzkadi
Xabier Mendiguren Elizegi
Anton Reixari.
Inork inoiz rnusika jarri
eta kantatuko dituelakoan edo...
Gogoan zauzkat... Jennifer
(balada beltza)
Gogoan daukat zure ile kixkur beltza
eta are beltzago, are kixkurrago... Afrikan;
zure azalaren morenoa, foko gorrien argipean;
zure antiaju ilunak, begi erituak estaltzean.
Gogoan daukat zure goizeroko basokada esnea
eguerdiko kafea eta whiski on the rocks gauean.
Gogoan daukat zure tanga nimiñoa, larruzko abrigu sintetikoa
latoizko pulserak, igurtziaren igurtziz urre distirakoak;
zure titien nekea, ipur masail gastatuak;
zure erkain xurizka, nikotinak horituak.
Baina batez ere, Jennifer, nik beti dauzkat gogoan
kolore guztietako txanponen truke
txupete arroxak miazkatzen dituzten
zure hortz ezinago zuriak.
Joao
(zortziko beltza)
Joao trenean doa
triki traki triki traki
bere beharrera
triki triki tra
Goizeko seietatik
triki traki triki traki
gaueko zortzita(ra)
triki triki tra
Hamabi ordu lanean
triki traki triki traki
beste bi trenean
triki triki tra
Urrun Angola beltza
triki traki triki traki
ta urrun Portugal
triki triki tra
Etxean andrea ta
triki traki triki traki
eskolan bi haurrak
triki triki tra
Etxe berriak egin
triki traki triki traki
eta bizi zaharrean
triki triki tra
Ieltseroen jornala
triki traki triki traki
mixeriazkoa
triki triki tra
Ladrilu pilatu ta
triki traki triki traki
tartean porlana
triki triki tra
Joaok ez du leitzen
triki traki triki traki
periyodikua
triki triki tra
Europan arrazistak
triki traki triki traki
goraka omen doaz
triki triki tra
Trenaren balantzatan
triki traki triki traki
ametsetan doa
triki triki tra
Lana galdu ezean
triki traki triki traki
datorren urtean
triki triki tra
Etxea erosiko du
triki traki triki traki
komuna daukana
triki triki tra
Kaka behintzat eiteko
triki traki triki traki (bis)
txuriek bezala
triki triki tra
Bat, bi, hiru, lau
(kalejira beltza edo euskal txa-txa-txa)
Maurizio asteazkenero
Ordizira abiatzen da
Hartu poltsak ta pardelak
Baserritarren perira
—Kuantoes elreló?
—Kuatromil peseta
—Hi haiz hi kabroia
—Bimilla peseta
Transistore, makinila
Eta despertadoreak
Dena salgai, dena merke
Dena made in Korea
—Lakalkuladora?
—Milsiento peseta
—Garestiegi duk
—Sorsirun peseta
Gaueskolan agertzeke
Bihurtu haiz poliglota
Lazkao-txiki joaten bazaik
Laister hasiko haiz bertsotan
—Gomasya tendraspues?
—Dosienta peseta
—Ta merkeagorik?
—Baibaña sulauta
| 
