Hiru poema

J.L. Otamendi

ene herriko plazak arku asko ditu

eta hala ere

bere begi goibeletan ez da inor galdu

arku asko ditu

eta behin ere

ez dute aurkitu

ziba gaztearen buruko txintxeta

Babelgo dorrearen behea

ene herriko plazak arku asko ditu

bere habe artean haurren jolasa gordetzen du

zeruak beltzez mintzo dira egunotan

nik hitz batzu

fereken labean mamiturikoak

zorion dzangada eskainiko dizut

unetik unera

porrot egitearen samina

eta begi ilunak eskuetan ditut

leihoak bezala gauari lotuta

nik agur bat

zeruen hizkera aldatzeko grina

poematxo baten aterpe beroan

zubi eta kaiak eraikiko ditut

kaiuz ehunduta arratsa

bizitza

kafetegietatik aterako balitz kalera

berriro ikustera bere garaipen totela

ikusiko luke

lokomotora bat desio erditik

kez betetzen gogoak eta

bihotzak

keramika apurren gisa leihotik botatzen

eta denbora ahalketsu egin den ordua

eta airea etenez josia ikusiko luke

non gizasemeak erratzen bait dira

(Argitaratzear dagoen

"Zainetan murrailak"

liburutik hartuak)