Eluska Fernandez

Bila zabiltza noraezean

badirudi gauek itotzen zaituztela

ilun

ametsik gabe

Eguna ez da hobea

haizeak ez dakar mezurik

tabako usaina baizik

Ba al dakizu...

bakoitzak badu nahikoa

pentsatzearekin

Bazoaz

edo doa, esan beharko

Baina ez omen du pena merezi

denborak bai ordea

bihar.

Sikira tabako usaina

gustatuko balitzaizu...

Eta hor zabiltza

Erritmorik gabeko dantzetan

sorgin bakarreko akelarretan

gau zoroetan

                    zoroetan

espaloi kantoietan

Hor zabiltza

surik gabeko joko arriskutsuetan

hegalaldi lurtar luzeetan

jira-biraka zainetan

                             zainetan

hotzikaren lautadetan

Ibili bazabiltza.

Baina izan

ba al zara?

Zenbat zenbat zenbat

alferrik da

ez da ez dago ez duzu aurkituko

egunak, asteak, hilabeteak

denbora

zenbat denbora

telebistari begira eta bila

gauak noiz noiz noiz

egia bihurtuko.

Orduak, minutuak, segunduak

segundu bakarra baino ez

ez da ez dago ez al zaitut

alferrik amesten

non non non

itsu        ero.

Behar zaitut

segundu bat

urteak

filme batek irauten

dueneko denbora

behar zaitut

zenbat noiz non

begira ero denbora egia

non zenbat noiz

ametsak ametsak ametsak

ez da ez dago errealitaterik

nigan

ireki ateak

ez malkorik irentsi

horditzera nator

desioz gainezka.