Gerra ez da amaitu! Erresistentzia zabaldu!

                                "Mientras sólo vuestro olor me demuestra que  estais vivos"

                                                                                            El Corazón del Sapo

Objetiboak izan behar duzue eta bihotzari kasu egin

zuek ez zarete paradisu erratuetan konfundituko

Ez duzue besteon kupel garratz beretik edango

        ardo garratzik edango

eta euri mingotsa dastatzen dugunok karriketan

lirika poliglotaz ezagutzen dugu atzerria gure herrietan zuen eskutik

Mihiak pozoindu dituzue eta aurpegiak atontzen dituzue irribarreak

esmalte

Gure herriek ez zuten erresistentzia nahikoa eskaini

Gure herriak okupatu, hustu

        hustiatu eta hostiatu

tiraniaren baloreak ezagutu

eta odola eta ardoa kolore beraz margotzen dela konturatzeko

denbora nahikoa izan genuen

biak garratzak zirela konturatzeko

        eta harrien inguruan eraiki dituzue zuen koloniak

guk jaurtiriko herrien inguruan

Frontearen alde berera itzuli dira garai bateko traidoreak

munizioak guri tirokatzen agortu zaizkie

beste lubakien ikuspuntu doilorretatik

eta esku batean defendatu genuen armarriaz

eta jaurtiki genituen proiektilen kaskiloen galderez afusilatzen

gaituzte orain.

Gure historiaren kapitulo honen amaiera ezagutzen dugu

herri okupatuaren kantuak abesteari utzi diogu aspaldian

pandero soinuak bafleetan aditzeari kultura deitzeaz

eta bihotzez objetibo izateaz pozten gara derrotan

Lasai.

Zuentzat ezpatatu ditugu mihiak

pozoindu ezpainak

mailutu besoak

ohostu dizuegu airea biriketatik

eta estrategia bera erabiltzen dugu oraindik

euria egiten duenean bertikalean tirokatzearena.

Kaioak ez dira gure herrian uso klonatuak

lasai zuek

gure herrietako kapitulo hau ez da amaitu

baina amaiera ezagutzen dugu