|
Gogoetaren silabak!
Joxe Azurmendi
Ba dakit nik gudua galdu
eta pakea irabazi
egingo duen herri bat.
* * *
Ikus beza bakoitzak zer nahi duen:
hilzorian dagona sendatu
ala hillak piztu.
Edo kandelak saldu entierroan.
* * *
Gure burua eskaxa da.
Bainan nik nahiago dut
neure buru eskaxarekin pobre
besterenakin aberats baino.
* * *
Arrotz sentitu nintzan Suede-n:
kaka esaten diote pastelari.
Euskaldun gelditzea erabaki nuen
derrefente.
* * *
Kafka gizon bat zan.
Oi zer atrebentzia izugarria
herri izan behar dan denporaotan!
* * *
Gizonak ezin du gizon izatearen
kontribuziorik pagatu.
Pobre izan. Filosofo guztiek
joan beharko dute
beren presupuestoak bajatzen.
* * *
Atila filosofo egin zanetik
zaldia logika da.
Rocinante metafisikoa zan.
Lastimarik ez dauka
euskal langilleriak
asto pare bat besterik.
Astoa ez dute oraindik
ideologizatu.
* * *
Platero-k ez zuen
euskerarik ikasi nahi.
Itzuli egin behar izan da.
Bainan arrantza estranjero bat
loratzen zaio gaixoari.
* * *
Atzo mezatara behar zan
derrigor eta gaur derrigor
mezutara. Ni konforme,
mazotara ez dan artean.
* * *
Filosofo danak zeuzkaten bi begi
bekokiaren azpian.
Bainan pentsamentuaren azpian
dioptria gutxiegi.
* * *
Poesia ez da
sustantibo bat kaiolan sartzea.
* * *
Euskaldunak poema bat bada,
asonanteren bat izango naiz ni.
* * *
Ernegaturik dabiltza jainko guztiak
Olinpo-tik uxatu zituzten ezkero.
Atseginago baita musa bat
jainko guztiak baino.
* * *
Gunadhya-k bere odolarekin
idatzi zituen poemak.
Bainan poema txar batzuek
irten zitzaizkion.
* * *
Jesukrixto gizon bat omen zan.
Bai, eta hil ta dana egin omen zuen.
* * *
Itzala saldu zion Axular-ek
euskeraren truke deabruari.
Ta guk deabrua erosi nahi dugu
euskeraren truke.
* * *
Egiari kriskitinak nork jarri,
salbatuko da gizona.
* * *
Esan zuen: dana egin leike
baionetekin. Gainean
exeri ez beste dana.
Bainan, progesoa: ba dakit nik
puntta punttan exerita dagoen bat.
Puntta punttan,
urteak, —eta oraindik ez du kantatu.
| 
