—Olerti—

Anai-arteko gudate-ondorean

Jautarkol

Itxas-ontzi-zatiak

ekaitz-ondorean

olatuen jostallu

oi-dirun antzean,

gelditu da Euzkadi,

utsik eta autsia,

munduko itxas nastuan

errukigarria.

Anai kementsuenak

il zaizkigun gudan,

urrun dauzkagu asko,

bestetzuk kartzelan...

Zenbat beren etxetik

artuta gauean

ilda laga dituzte

bide-bazterrean...!

Nun-nai bekozko illuna,

nunai ezezpena,

jauntxoen esku gure

dirua ta azkena,

biotzetan bildurra,

nun-nai gorrotoak,

ezpaiñetan itz txarrak,

begitan malkoak...!

Jauna, Goiko Jaun ona,

erruki zakigu!

Zigor au zure eskuak,

maitez, eman digu.

Entzun, ba, zure semeen

eskari beroak...!

Zure Erri kutunari

zabaldu besoak...!

Gogora zaite, beti

gure Euskal-Erriak

zuganontz jasoz euki

ditula begiak.

Beti aitortu zaitu

gizarte-aurrean...

Beste Jaunik ez du

izan gudan ta pakean.

Gugana itzuli zure,

begi maitetsuak,

t'errukitsu barkatu

gure pekatuak.

Gorrotoak itzali,

txukatu malkoak,

batu euskaldun oro

zure babesean,

euskeraren besotan,

Euzkadia maitean...!

1939.