Ondotik, barnera

Txiki

Nonbaitean bizirik zinela jabetu nintzelarik

Norbaitek zintuela jakin nuelarik

Zaila da esatea

ezagutu gabe hasi nintzaizula maitatzen

Zure hots nabariak

oihartzunik gabeko ahotsak

hunkitu nindutelarik

ezin nintzen dohatsu izan

zu gabe

Poztasunak

eta besarkatu eziniko sentipenak

ilundu zuten nere baita

Nerea bete nahiean

eduki nahi izan zintudan

Beldurra

lotsa

kateak nituen

oztopo

hertsia, zaila zintudan

ondoan

Ezin dut gogoratu

eskutik hartu ninduzun eguna

agian, gaua

Biluzten hasi zinelarik

ez zintuenak

eman zidan pena

zu ezagutu gabeko urte luzeak

izan nituen etsai

                 arrotz

nere baitan hazi zinelakoz

Baina

ederregia zinen

               zara

               libre izateko

Zure askatasuna oihukatzen dut

Zintudan maite, maite zintudan

haunat maite, maite zaitudalakoz ere barnean

                                                    Euskara