Hitz Gorritan

OTAN, NASA, "Galaxietako Gerla" eta
hainbat halako heriotz jokuren aurrean

Horbel

     Dailua soinean, bana banaka

zintzarriak egiten zituela,

zaldizko omen zetorren

herio izugarria

eraberritu zaigu. Apaindu zaigu

izarretako leinuru bitxiez.

Aintzinako beldur mina zorabio

xurgakari bihurtu aiki zaigu,

eguratsetik kanpotik etorriz

metalezko printzez gurdi gainean.

Herio Printzearen Zenizienta

bilakatu gara.

Heriorekiko maitaldi itsu

baten manupean bezala gaude...

     Nitaz bezain batean,

sentitzen segi nahi izango nuke

beldur-hotzikara bizkarrezurran,

berriz sentitu nahi izango nuke,

odolez beterik mapa ikustean,

aurpegia gorrizkatzen zaigula.

Nola sentitu ote, mapan ereinda

zeinnahi hirik, edozein puntu gorrik,

begitartera jauzi egiten zaigun

odol zipriztin bat oraino izaten

jarraitzen duela?...

     Hitz gorritan has gaitezen, gaizpide

ditzagun sasi maisu humanistak:

Banaka banaka hunkitzen gaitun

herioa gora!

                  Gizagaixoen

bortxa hiltzailea gora eta gora

terrorismoa!

                  Behera

metalezko printzez gurdi gainean

liluratzen gaitun Herio Printzea!

     Behera maitaldi itsua!

Gora betiko izua!...