Ixtaklok

Mañex Lanathua

Ixtaklok (1)

Ixtaklok

ondoztegi zurpailaren gainean ixtaklok

zango mehe zintzilak balantzan

jarri da haurra.

Ixtaklok (2)

«Hi? Aspaldiko haritz zaharra

zenbat urtekoa da gizonaren iraupena?

Hik badakik? nolaz?

emazteak jasan behar dituen erdiminak, gero,

gizonaren minberatasunak ez badu iraupenik?

               * * *

Ibarrak ibarrari,

larreak larreari,

nabak nabari,

pendoitzak pendoitzari irauten dutenean,

olerkariaren hitz umexurtxa trahitzen die denek.

Bildots sort-berriaren arropa xuria

ongarri kakatsuak zikintzen duen bezala,

torra torraka,

tira tiraka,

katzaka katzakaka,

hor,

merkatuko plazen tirabiretan

urkatuko die haur sortu berria.

Buhame zarpail,

umexurtx, joanen haiz olerkari, hire hitzekin,

hire hitzaren ixiltzera.

Ixtaklok (3)

Ixtaklok

ondoztegi zurpailaren bizkarrean

zaldun gazte hezgaitzak

arri! arri! dio,

garrasi beldurtuan

desafiozko zaldiaren lauazkako trostari.

Arri! Arri!

haurñoaren boz alaia

gizon zahar baten oihu hauskor erdoilari

nahasi da.

Ixtaklok (4 )

Arri!! Zaldi zurpaila!

Ibarretik ibarrera,

larretik larrera,

nabatik nabara,

trosta — jauzi ezin berdinduan

bere papo zabaleko hats kolpearen indar ikaragarrian,

derama

zaldun hezgaitz zauritua

Ahuxkiko bortutik harandiko hegalera.

Ixtaklok (5)

Aspaldiko haritz nasaiaren itzal goxoan,

haurño bat zegon ixtaklok

zaldi zurpailaren bizkar-hezur zorrotzean.

Ke eta gar aztaparretan

joan dira zaldi zaldun

Ibarlako bide gorde harridunetarik.

               * * *

Olerkari zaldunaren

irrintzin gordina,

hor entzun dut.

7/5/84