Andere haundi

Daniel Landart

Andere haundi, andere haundi

Andere haundi bat iduri

Itzuli-mitzuli...

Begi-keinuka, ardura deika

Andere hori ari zait neri

Itzuli-mitzuli

Dena tripustelkeri.

Andere haundi, andere haundi

Haundi bezain itsusi...

Itsusi, itsusi

Suge eztena, zaia beltzak

Heriotzearen hortzak

Andere hori, andere hori

Ezin dezaket ikusi

Baita zinez beldurgarri.

Andere horri, andere horri

Iheska nabil, iheska

Noiztenka, noiztenka...

Baina ba dakit ba dakit garbi

Bihar edo etzi

Andere horren beso artera

Beharko dutala erori...

Erori, erori.

Andere horrek, andere horrek

Behin betiko

Bereganatuko nauenean

Egun batean

Ez dut nahiko

Lorerik

Nigarrik

Are gutiago

Laudoriorik.

Ehortz nezatela, ehortz nezatela

Langileak, LANGILEAK

Ehortzen diren bezala

Xume-xumeki, xume-xumeki.

Eta zilo barnean

Geldituko naizenean

Bakar-bakarrik eta hotz-hotza

Hotz-hotza

Zuen bizitzak segi beza,

SEGI BEZA!

1975/V/26an