Lo negargarri... amets zoriontsu

Igarza'tar Eusebi

— Zergatik, amaixo,

    Gaur negar, zergatik?

    Aitatxo ez al da

    Sendatu oraindik?

— Sendatu da, biotz...

    Betiko sendatu,

    Baiñan Jaungoikoak

    Beregana deitu.

— Ta kaja beltz ortan

    Bidea egingo?

    Aita ez da pozik...

    Oso itun dago!

    Aurpegia zuri

    Ta ez mugitzen...

    Lenago beiñere

    Etzan ola egoten.

— Ai!, ai! semetxoa...

    Aitatxo... ba... lotan,

    Gauean zu nola...

    Berdin! ametsetan!

— Nik, ba... aingeruak

    Ega txuriekin

    Ikusten askotan,

    Ta aitak zer orain?

— Aingeru taldeak

    Beregana elduki

    Eraman dutela

    Zerura kantari.

    Jainkoak irripar

    Egin goxo-goxo...

    Ta esan: «Zoriontsu,

    Ene morroi zintzo! »

— Eserleku dio an

    Eskeñi beretzat

    Ta beste bi erakus,

    Semetxo, guretzat.

— Ta noiz esnatuko

    Ba, ama, aitatxo

    Amets polit ori

    Guri kontatzeko?

— Aita, betiko lo...

    Ta esnatu ezin...

    Zeruan bilduko

    Biok berarekin.

— Goazen, ama, goazen

    Aitatxon ondora,

    Geigo ez negarrik...

    Ta goazen zerura!