Azkatasuna ez daigun artu olgetan

Enbeita'tar Balendin

Zein ederra dan azkatasuna!

Oso ederra benetan!

Ain eder eta ona dalako

Ez daigun artu olgetan.

Bear dan legez ibilli ezik

Geure arazu danetan,

Kalte aundiak ekarri leikez

Giza-bideko gauzetan.

Azkatasuna ez daigun artu

Bestiak menperatzeko,

Iñoren gauzaz jaubetu eta

Norberak aginduteko.

Danok daukagu eskubidia

Azke bizi izateko,

Guztiok gara Aita batenak,

Bardiñak Aitarentzako.

Umetzaroko Azkatasuna

Oso ederra benetan,

Guztiok euki bear genduke,

Aldi pozkor au gomutan:

Azke ibilli eta jolastu,

Kezka gabe gabaz lotan...

Azkatasun au bear genduke

Gure Euskal-errietan.

Lokarripean dagon erria

Ezin leike ondo bizi,

Bere izakera galdu gordian

Sarritan dogu ikusi.

Buru diranak ondo bizi nai,

Lanari beti igesi;

Azkatasunik bako errian

Lotsabakoak nagusi.

Azkatasunan alde guztiok

Gogotsu lan egin daigun,

Amildegira jausi bagarik

Jokatu gau eta egun,

Euskaldunaren zaindari dogun

Deun «Mikel» arturik lagun,

Toki danetan agertuagaz

Gizon, Euskaldun, Fededun.