Euskera zelan indarbarritzen asi

Enbeita'tar Balendin

Gure euskera indarbarritzen

Zelan egin leiken asi?

Ezkongai diran euskal-zaleai

Eraiñaz ezkondu arazi,

Onen semeak euskera ondo

Egingo leuke ikasi,

Izkuntza eder au barriz loratzen

Egingo geunke ikusi.

Euskal-zaleak mutil zarraren

Izenik ez dau merezi.

Euskaldun diran guraso askok

Lotsea galdu dau eraz;

Aita ta ama Euskaldun eta

Seme-alabak «gazteleraz».

Entzun nai dabe, «euskaldun gara

jaiotzez eta «oituraz».

Euskaldun izan eta umeai

Zertako egin erderaz?

Euskaldun ona bardin bazara

Umeai egin euskeraz.

Etserritar bat etxian bada

Eta etxekoak lagun,

Etxiak ditun galdu gordetan

Bitzuak dira errudun.

Gure lur maite jausi ez dedin

Etsaienpian erdaldun,

Kanpoko gauzai uko egiñaz

Etxia zaindu dagigun,

Euskalerriak gura badogu

Iraun dagian euskaldun.

Euskera zelan jaso legiken

Sarritan dauste itandu.

Oitura onak, jolasak bardin,

Zabalduten alegindu;

Euskera ikasi nai dabenari

Biotz onagaz lagundu;

Nastezalerik baldin badator

Lengo tokira bialdu.

Zorioneko gure izkuntza

Ori egingo bagendu!

Landara bage lorarik ez da,

Ez lora bage fruturik;

Euskera barik ezin izan lei

Egizko Euskalerririk.

Izkuntza eder au zelan burutu

Gaztetan ikasi barik?

Umetxuari erakustia

Ez dago beste biderik,

Bestela gure ama euskerak

Ez dau jasoko bururik.