Olerkiak

N. Etxaniz

Zugaitz bustia

Euria atertu da...

Errekaldeko errotak,

gainean ditu

zeruko laiño-pelotak.

Bidetan euri-potzuak...

atertutako euriak

utzi dizkigun

zeru-ispillu argiak.

Udazkena eldu da

—dio zerutik goibelak—

eta malkotan

dijoaz biotz-orbelak.

Meza berri egunean

Oparitxo bat dezu...

Biotza barruan!

Aingeruak zerutik

jai dute zeruan.

Egun aundi orretan,

gaitzazu goguan!

Ezpaidu edozeinek

Jainkoa eskuan!

Belen-giro

Ai, palmondoak

Belen'en asarre,

aize zoroetan

dantzan tai gabe.

Zaudete ixillik!

Kontuz, oiñ-otsak!

Lotan dago Aurra.

Ixo, biotzak!

.................

Artzaiok, oiu!

Poz, mendi-ibarrok!

Mari'ren Aur Artzaia

izen-zai dago.

Erreka pol-polak,

esne txuritan!

Arkuxneak jauzka,

soiñu iturriak;

ta txori-kantaz alai

mendi ta baso.

Mari'ren Aur Artzaia,

izen-zai dago.

Taka-taka

Zapatari, zapatari,

beti taka-taka-taka...

Tiki-taka, tiki-taka

eman oiñetakoari.

Zapatari, zapatari,

zula beti narru zarra,

naiz ta okertu bizkarra,

noizean bein zurrutari.

Zapatari ondatzaille,

tiki-taka maillu-otsa,

ire lana ez dek motza,

obe uke motxaille.

Zapatari galtza-urdin,

ixkillapeko sorgin,

ire lana ikusita,

asarre dek San Krixpin.

Bidekoa

Ba-dijoa Maria

zelaitan barrena,

lore-bide txuria

sortuaz, Belen'a.

Lizarpe batean du

bere atsedena,

aruntza dator egan

Aingeru goiena.

—Zer dakartzu, Gabriel,

aingeru argia?

—Emen bizi ote-dan

Andre eder, Maria.

Lizarpea, argizko

lorez da josia;

zeruak aditu du

Jainko-goiantzia.

Sagasti berritikan

degu landarea;

kantari du errekak

daraman bidea;

sagar-loretik dator

zeruko Alea;

Andre Maria'k ba-du .

Jainko dan Semea.

Udazkena

Orbelak goltik bera datoz.

Ziruliruli... lurra

bete zaigu ostoz.

Nun dago Erregiña,

ta aren mirabeak?

Ziruliru... errekak

orbelez beteak.

Ego-aizeak jo du

aurtengo larrosa...

Orra nola dijoan

mundutarren poza!