|
Harriaren mezua
Luis Baraiazarra
Harkaitzaren harrizko giharra
marmar, hagin-kirrixkadaz
sortu da barrunbetatik lakar
leherketa-lurrikaraz.
Eta harrobiak aurrera darrai
haurgintzen barneko ikaraz.
Harritzar harro, erraldoi gordin
garraxi sorrez sortua,
lur orpotatik hargin gogorren
izerdi lorrez lortua.
Marmol mokorra, haitzezko ezpal,
hezur markaz gogortua.
Lur-sabeleko haitz-izpiritu,
gai jatorrez osatua,
prehistoriako sustrai-erro
iraunkorrez gauzatua;
harpeetako arbaso haien
aterpe ta ostatua.
Gure Herriak hor omen dauka
aintzinateko oihartzun,
haitz sakonetik datorren hitza
gaur ere badaiteke entzun...
Euskal hizkuntza ez ote dugu
harkatiz kutsuko erantzun?
Hor dugu geure harkaitz emankor
sostengutzat ezarria,
gure geroa ziurtatzeko
azpi-azpian jarria.
Ez bedi gerta inoiz soil-soilik
antzinako oroitarria.
Hor dugu geure harkaitz emankor
dorretxetan ezarria,
Erdi Aroko arnasaz datza
aurpegiko armarria.
Ez bedi gerta Aberri zahar
kutun honen hilarria.
Harrian daude inskripzioak
harria zen mandatari,
garai zaharren lekuko argi
etortzekoen atari.
Jaungoikoaren Legea ere
bi harritan zen irarri.
Harri arotik gaur arte hemen
kontatu ahalako ekaitz:
asmapen beri erabilgarriz
sortu dira zenbait emaitz.
Plastikoaren abiaduran
harria gogor, moldakaitz!
Enperantzako oroitarrietan
finkaturiko gorpuak
urteen urtez afrontupean
erosioz idortuak;
harri zaharrak museoetan
momia sor bihurtuak.
Moda eroen erasopean
harriak ziran estali,
haien aurpegi leinargizkoak
kare zuritan itzali...
Orain harrien hezurdurara
nahi omen dugu itzuli.
Baina nik uste, harriak harri,
guztia dela hilotza;
ahorik aho arnas-estuka
Euskal Herriko bihotza,
haren inguru-minguru beti
zemaika da heriotza.
Hortxe daukagu arbaso haiek
utzitako herentzia
noragabeko muga estutan
lur meharrean hertsia.
Birsorturik da gauza zaharren
aldeko kontzientzia...
baina euskarak ez ote dauka
bere azken sententzia?
Gure ahotsa grabaturik da
aiton-amonen harrian
musoetako haltzari dugun
haien arnasa larrian.
Arrotz hots hitsa antzematen dut
gazteen hitz mingarrian
gazteen hitz mingarrian...!
Eta harrobiak aurrera darrai
bere gisako haurgintzan;
haitza ageri da oinarrizkotzat
aintzinakoen ekintzan.
Nik neure harri eskoriatzen
hemen dihardut hargintzan.
| 
