|
Zugana nator
J.M. Azpiri
I
O! Alexander zugana nator
Ainbat gauza esatera,
Kontura gabe sartu zaituzte
Nagusien adiñera.
Ume jolasak utzi dituzuz
Guztiak alde batera,
Urteak joanik iritxi zera
Amazortzi gaindutera,
Orregaitikan bizi berri bat
Dezu emendik aurrera.
II
Adiñ ederra daukazu eta
Obeago osasuna,
Ume ziñala sortu zitzaizun
Menditar zaletasuna.
Euskal giroan aurkitu dezu
Aberri jabetasuna,
Jarraitu bide zuzenetikan
Izan biotz poztasuna,
Gurasoentzat gorde itzala
Euskadintzat maitasuna.
III
Ni urteetan zartzen nijoa
Orain zu zatoz aurrera,
Uzten dizutan euskal giroa
Eraman lagun artera.
Gure euskera maitagarria
Plaza erdira atera,
Zure antzeko gazte lagunak
Danok jokatu batera,
Erri zar onen askatasuna
Lortzeko lan egitera.
IV
Mundu onetan gauzak ez dira
Nai bezelaxe gertatzen,
Lore artean bein baiño geio
Arantzak dirade sortzen.
Uste gabeko gauza txarren bat
Iñoiz bazaitzu jazotzen,
Jarrai aurrera etsitu gabe
Dezun okerra zuzentzen
Zeure burua ikusi arte
Bear bezela goratzen.
V
Alde danetan agertu zure
Euskaldun gizatasuna,
Maita ezazu gure izkuntza
Zaindu bere nortasuna.
Lagun artean zabaldu beti
Aberri zaletasuna.
Gazte giroan dezutelako
Geroko etorkizuna,
Gure erriak lortu dezadan
Betiko askatasuna.
VI
Gure burruka ez uste danik
Ume arteko jolasa,
Askatasuna lortzea ezta
Izango gauza erreza.
Baiña zuk euki biotz barruan
Ori lortzeko amesa,
Etxean eta lagun artean
Euskeraz egin solasa,
Egunen baten Aberri aske
Batean dezagun goza.
VII
Zure laguna aukeratzean
Kontuan euki ezazu,
Gaur Otso asko bildotz jantzita
Dabiltzala ba-dakizu.
Oitako batek urreratuta
Zerbait esaten badizu,
Bildurrik gabe era ontako
Erantzuna emaiozu,
Aberriaren etsaia eta
Jainko gabea zera zu.
VIII
Ez pentsa beti lortutzerikan
Zeure biotzeko naia,
Gauza guztiak izatn dute
Asiera ta amaia.
Izan zaitez ba beti bezela
Zintzoa eta alaia,
Gero giroa aldatutzean
Datorrenean garaia,
Egunen baten izango zera
Ipar kaleko galaia.
Ondarru, 1987ko Irailla.
| 
