L I T E R A T U R   A L D I Z K A R I E N
G O R D A I L U A

 

 
 

                   - Orrialde nagusira itzuli
                   - Ustela aldizkaria
                   - Ale honen aurkibidea

                   - Ale honi buruzkoak (azalaren irudia eta fitxa)

Aurreko artikulua— Mermelada Ustela (1976) —Hurrengo artikulua




 

 

        Hiru gutun, hiru, jaso ditugu Zorion Ustela argitaratuz geroztik: Alfabetatze talde batena ale bat eskatuz —alea eta guante pare bat bidali genien, eskuz esku pasatzean inor kutsa ez zedin—, inprenteroarena bestea, betiko inposiblea eskatuz gizarajoa, eta hirugarren hau:

 

Tentazio gorriak salbatuko gaituelakoan jendearen aurkako irri zimelean aurkitzen dutan pozak gailentzen nauela aitortu beharrean naiz. Bitez gerizondoak luze, begoz gerizak gorri, izan dezagun zorion ustelaren plazerra, zorion usteldu gaitezen, «ustel guztiak ez baitira hain ustelak», zorion ustela testigu. Begiez ikusi nuenean ohartu nintzen ustelaren zorionaz, irrika barneratu nintzen, irrikaz gainezka irten behar izan nuen asetze motzegia nabaritu nuelako. Eta aurka joatearen edo besteen zer esanari axolik ez izatearen, neuk nere bide markagabea jarraitzearen zorion ustela ezagutu dut.

        Zimaurtegiko arrosaren fotokopiak liluratu nau. Harrez geroz zimaurtegiak maite ditut eta egunero erregaitzen ditut arrosarik eta klabelinik erne dadin. Betorkigu eromena, betor eta benedikatua izan bedi, nahiz askok gaitzetsi, begoz heurak heuren dogmatismu satisfetxoaren zorionarekin.

        Sagarraren txurtana ipur bihurtu den erreinuan zorriak ere kantari hasi zaizkigu, eskoletako haurrek ez dute hizkuntza estrainoa baizik mintzatzen, emakumeak plastikozkoak izanik ere gizonak zoriontsu izan daitezke, dutxaren plazerra urak darama plazerrez asetua eta zirkoak bere bidea jarraitzen du inuxenteak eta ez hain inuxenteak alegeratuz, edozer gauza daiteke posible bai Granadan bai zorion ustelaren erreinuan. Eta guk Euskal Herria eginen dugu, euskaraz jantziko dugu gure hitza besteek ikas dezaten eta gu gu izan gaitezen, aspertu baikaituzte hainbeste lelo eta berritxukeriarekin, bai goikoek, bai behekoek MUGALDE HERRIKOAK GARA.

        Nahiz gutxi izan, ez gara azken mohikanoak eta denok agurtzen zaituztegu bihotz eta ipurdiz:

        Zorion ustelaren izenean marrubi bila dabiltzan agure guztiei agur

        zorion ustelaren izenean sua pizteko egur bila mendira joan diren lanik gabeko guztiei agur

        zorion ustelaren izenean larrurik jo gabe lo egiten duten sifilitiko guztiei agur

        zorion ustelaren izenean beldurrez pixa egiten pekatuan harrapatu dituzten guztiei agur

        zorion ustelaren izenean oraindik zerurik izanen dugula sinesten duten guztiei agur

        zorion ustelaren ustelaren infernua zerua baino maiteago duten guztiei agur

        zorion ustelaren izenean zimaurtegiko arrosak maite dituzten guztiei agur

        bedi zuekin ZORION USTELA.

Atarian etsita eta kabreatuta,
J. Ig. Garmendia
PARIS

 



Literatur Aldizkarien Gordailua Susa argitaletxearen egitasmoa da.